Уметниците Наташа Неделкова, Крсто Глигорјадис и Мила Добревска се тројцата финалисти за наградата „Денес“ за млади македонски визуелни уметници до 35 години. Наградата се доделува на годишно ниво на исклучителна и истакната тековна уметничка практика. Победникот покрај двомесечната програма за престој на уметници во Њујорк (во Residency Unlimited), вклучува и други новини и резиденции. Наградата овозможува и уникатно искуство на уметниците да бидат дел од специјален едукативен процес во визуелната уметност насловен „Совршениот уметник“, да имаат средби и презентации со интернационално жири и да продуцираат ново дело, во рамки на изложба како финалисти на наградата.
Наградата се доделува по 19. пат, а ја организираат Факултет за работи што не се учат (ФРУ) од Скопје во соработка со Мрежата „Награди за млади визуелни уметници“ (YVAA), резиденциската програма Residency Unlimited (RU), Њујорк и фондацијата Trust for Mutual Understanding, Њујорк. Отворениот повик траеше од 17 април до 31 мај, а се пријавиле дваесеттина кандидати.
За победникот ќе одлучува жири составено од: Хитоми Ивасаки, директорка на Одделот за изложби и главна кураторка во Музејот „Квинс“, Њујорк, Рона Копецки, кураторка и историчарка на уметност, уметничка директорка на галеријата acb во Будимпешта, со-основачка на Easttopics, Ѓорѓи Десподов, мултидисциплинарен уметник од Македонија кој живее и студира во Хаг, Холандија, добитник на наградата „Денес“ (2023).
Финалистите ќе подготват групна изложба со нивни дела која ќе биде отворена кон крајот на годинава. Тогаш ќе биде соопштен добитникот на „Денес“.
Досегашни добитници на наградата „Денес“ се: Марко Гутиќ Мижимаков, Ѓорѓи Десподов, Клелија Живковиќ, Бурџу Мусли, Ивана Мирчевска, Елена Чемерска, Верица Ковачевска, Зорица Зафировска, Иван Ивановски, Филип Јовановски, Велимир Жерновски, Илија Прокопиев, Кристина Божурска, Ѓорѓе Јовановиќ, Ана Ивановска, Борис Петровски, Атанас Ботев, Далибор Тренчевски, ОПА (Опсесивна посесивна агресија), Славица Јанешлиева.
